Warning: భారత్కు ఎల్ నినో ముప్పు.. ఎండలు పెరిగి, వర్షాలు తగ్గే అవకాశం.. WMO హెచ్చరిక
రానున్న రోజుల్లో భారత్ను తీవ్రమైన ఎండలు, తక్కువ వర్షపాతం పట్టిపీడించనున్నాయా? అంటే అవుననే హెచ్చరిస్తుంది ప్రపంచ వాతావరణ సంస్థ. పసిఫిక్ మహాసముద్రంలో పవర్ఫుల్గా మారుతున్న ఎల్ నినో ప్రభావం వల్ల భారత్లో మునుపెన్నడూ లేని విధంగా అత్యధిక ఉష్ణోగ్రతలు నమోదవ్వడంతో పాటు సాధారణం కంటే తక్కువ వర్షపాతం నమోదయ్యే అవకాశం ఉందని సంచలన అప్డేట్ ఇచ్చింది.
భారత్తో పాటు ప్రపంచవ్యాప్తంగా అనేక ప్రాంతాలలో విధ్వంసకర వాతావరణ పరిస్థితులు తలెత్తనున్నాయని ప్రపంచ వాతావరణ సంస్థ హెచ్చరిస్తోంది. రాబోయే నెలల్లో భారత్ తీవ్ర ఎండలు, తక్కువ వర్షపాతాన్ని ఎదుర్కొనే అవకాశాలు కనిపిస్తున్నాయి. ప్రపంచ వాతావరణ సంస్థ (WMO) విడుదల చేసిన తాజా నివేదిక ప్రకారం, పసిఫిక్ మహాసముద్రంలో వేగంగా బలపడుతున్న ఎల్ నినో ప్రభావం కారణంగా భారత్లో సాధారణం కంటే అధిక ఉష్ణోగ్రతలు నమోదయ్యే అవకాశం ఉంది. అదే సమయంలో వర్షపాతం కూడా తగ్గే సూచనలు కనిపిస్తున్నాయి. భారత్తో పాటు ప్రపంచంలోని పలు ప్రాంతాలు కూడా ఈ ప్రభావాన్ని ఎదుర్కొనే అవకాశం ఉందని సంస్థ తెలిపింది.
ఆగస్టు నుంచి అక్టోబర్ వరకు ఎల్ నినో ప్రభావం తీవ్రం
WMO అంచనాల ప్రకారం, 2026 ఆగస్టు నుంచి అక్టోబర్ మధ్య ఎల్ నినో ప్రభావం అత్యంత బలంగా ఉండే అవకాశం ఉంది. పసిఫిక్ మహాసముద్ర ఉపరితల ఉష్ణోగ్రతలు సాధారణం కంటే 2.9 డిగ్రీల సెల్సియస్ వరకు పెరగవచ్చని పేర్కొంది. దీని ప్రభావం దక్షిణాసియా దేశాలపై, ముఖ్యంగా భారతదేశంపై ఎక్కువగా కనిపించనుంది.
వర్షపాతం తగ్గడం, ఉష్ణోగ్రతలు పెరగడం వల్ల తాగునీటి కొరత, వ్యవసాయ రంగంపై ఒత్తిడి, విద్యుత్ వినియోగం పెరగడం వంటి సమస్యలు తలెత్తే అవకాశాలు ఉన్నాయి.
ఎల్ నినో అంటే ఏమిటి?
పసిఫిక్ మహాసముద్రంలోని సముద్ర ఉపరితల జలాలు సాధారణం కంటే ఎక్కువగా వేడెక్కే పరిస్థితినే ఎల్ నినో అంటారు. దీని ప్రభావంతో ప్రపంచవ్యాప్తంగా గాలి ప్రవాహాలు, వర్షపాతం, ఉష్ణోగ్రతల్లో మార్పులు చోటుచేసుకుంటాయి. భారత్లో సాధారణంగా ఎల్ నినో ప్రభావం ఉన్న సంవత్సరాల్లో వర్షపాతం తగ్గే అవకాశం ఉంటుంది.
ఇండియన్ ఓషన్ డిపోల్ ప్రభావం కూడా ఉండొచ్చు
నిపుణుల అభిప్రాయం ప్రకారం, ఈసారి పాజిటివ్ ఇండియన్ ఓషన్ డిపోల్ (IOD) కూడా ఏర్పడే అవకాశం ఉంది. ఎల్ నినోతో పాటు ఇది కూడా ప్రభావం చూపితే కొన్ని ప్రాంతాల్లో తీవ్ర కరువు, మరికొన్ని ప్రాంతాల్లో భారీ వర్షాలు లేదా వరదలు సంభవించే అవకాశం ఉందని హెచ్చరిస్తున్నారు.
ముందస్తు చర్యలు తీసుకోవాలని సూచన
ఎల్ నినో సాధారణంగా ప్రతి 2 నుంచి 7 సంవత్సరాలకు ఒకసారి సంభవించి, దాదాపు ఏడాది పాటు కొనసాగుతుంది. వాతావరణ మార్పుల ప్రభావాన్ని తగ్గించేందుకు ప్రభుత్వాలు, సంబంధిత శాఖలు ముందస్తు చర్యలు తీసుకోవాలని WMO సూచించింది. ప్రజలు కూడా వాతావరణ శాఖ విడుదల చేసే హెచ్చరికలను గమనిస్తూ అప్రమత్తంగా ఉండాలని నిపుణులు సూచిస్తున్నారు.