తెలంగాణ పదో తరగతి సప్లిమెంటరీ ఫలితాలను విద్యాశాఖ విడుదల చేసింది. జూన్ 3 నుంచి జూన్ 13 వరకు జరిగిన టెన్త్ సప్లి ఎగ్జామ్ పేపర్స్ ను జూన్ 14 నుంచి 16 వరకు స్పాట్ వాల్యూయేషన్ చేశారు. పదో తరగతి సప్లీమెంటరి పరీక్షలకు 42,834 మంది దరఖాస్తు చేసుకోగా.. 38,741 మంది విద్యార్థులు పరీక్షలకు హాజరయ్యారు. ఇక వీరిలో 28,415 మంది ఉత్తీర్ణలయ్యారు. పదో తరగతి సప్లిమెంటరీ ఫలితాల్లో 73.35 శాతం ఉత్తీర్ణత నమోదైంది. బాలురు 71.05 శాతం, బాలికలు 77 శాతం ఉత్తీర్ణత సాధించారు. సప్లిమెంటరీ ఫలితాల్లో జనగామ జిల్లా 100 శాతం ఉత్తీర్ణతతో టాప్ లో నిలిచింది. సంగారెడ్డి జిల్లాలో అత్యంత తక్కువగా 55.90 శాతం ఉత్తీర్ణత నమోదైంది.
అధికారిక వెబ్ సైట్ లో..
ఇక ఈ పదో తరగతి సప్లిమెంటరీ ఫలితాలను బోర్డు ఆఫ్ స్కూల్ ఎడ్యూకేషన్ కు సంబంధించిన www.bse.telangana.gov.in లో చూసుకోవచ్చు. రీకౌంటింగ్ కావాలనుకునే విద్యార్థులు జూలై 7 లోపు ఒక్కో సబ్జెక్టుకు 500 రూపాయల చొప్పున చెల్లించి దరఖాస్తు చేసుకోవాల్సి ఉంటుంది. రీ వెరిఫికేషన్ కోసం ఒక్కో సబ్జెక్టుకు 1000 రూపాయిలు చెల్లించాల్సి ఉంటుంది.
టెన్త్ ఫలితాల్లో కీలక మార్పులు..
ఈసారి టెన్త్ ఫలితాల విడుదలలో ప్రభుత్వం కీలకమైన మార్పులు చేసింది. గతంలో ఉన్న కేవలం గ్రేడింగ్ విధానానికి బదులుగా, ఈ ఏడాది విద్యార్థుల మెమోలో గ్రేడ్స్‌తో పాటు వ్యక్తిగతంగా పొందిన మార్కులను కూడా చూపించారు. ప్రతి సబ్జెక్టుకు మొత్తం 100 మార్కులలో 80 మార్కులు బహిరంగ పరీక్షలకు, 20 మార్కులు ఇంటర్నల్ అసెస్మెంట్‌కు కేటాయించారు. చివరకు, విద్యార్థుల జీపీఏ మెమోలో ఎక్స్‌టర్నల్ మరియు ఇంటర్నల్ మార్కుల వివరాలను స్పష్టంగా పొందుపరిచారు.
గతంతో పోలిస్తే..
ఇక 2024 సంవత్సరానికి సంబంధించిన ప్రధాన ఎస్‌ఎస్‌సీ (టెన్త్) పరీక్షలు మార్చి 21 నుండి ఏప్రిల్ 4 వరకు నిర్వహించగా, రాష్ట్రవ్యాప్తంగా 5,09,403 మంది విద్యార్థులు హాజరయ్యారు. ఇందులో 2,58,895 మంది బాలురు, 2,50,508 మంది బాలికలు ఉన్నారు. ఈ పరీక్షల్లో రాష్ట్రవ్యాప్తంగా 92.78 శాతం ఉత్తీర్ణత నమోదైనట్లు అధికారులు వెల్లడించారు.
Suresh
